ایران کے وزیرِ خارجہ نے ایک پریس کانفرنس کے دوران واضح کیا ہے کہ ایران اپنی خودمختاری، دفاعی صلاحیتوں اور جوہری حقوق پر کسی بھی عالمی دباؤ یا دھمکی کے آگے نہیں جھکے گا۔ ان کا کہنا تھا کہ ہم امن کے حامی ہیں لیکن اگر ہم پر حملہ کیا گیا یا ہمارے اداروں کو نشانہ بنایا گیا تو ایران پوری طاقت سے جواب دے گا۔

ایرانی وزیر خارجہ نے امریکہ، برطانیہ، فرانس اور جرمنی کے حالیہ بیانات پر تنقید کرتے ہوئے کہا کہ ایران کو لیکچر دینے سے پہلے ان ممالک کو اپنے دوہرے معیار دیکھنے چاہییں۔ انہوں نے مزید کہا کہ ایران پر الزام تراشی کرنے والے خطے میں اصل بدامنی کے ذمے دار ہیں۔ انہوں نے زور دیا کہ ایران کا جوہری پروگرام پُرامن مقاصد کے لیے ہے اور ایران این پی ٹی (NPT) کے فریم ورک کے اندر رہ کر کام کر رہا ہے۔