ممبئی: مشہور بھارتی موسیقار آدیش شریواستوا کی بیوی، وِجیتا پانڈت نے دعویٰ کیا ہے کہ بالی ووڈ کے بادشاہ شاہ رخ خان نے ان کے شوہر کی وفات کے بعد ان کے بیٹے کی دیکھ بھال کرنے کا وعدہ کیا تھا، لیکن اب وہ فون کا جواب بھی نہیں دیتے۔
ایک حالیہ انٹرویو میں وِجیتا نے کہا، "میرے بیٹے اووٹیش نے بہت محنت کی ہے، لیکن بدقسمتی سے اسے فلم انڈسٹری میں کسی قسم کا تعاون نہیں مل رہا۔ فنکار، پروڈیوسرز، اور ڈائریکٹرز جانتے ہیں کہ میرے شوہر اب ہمارے ساتھ نہیں ہیں، پھر بھی کوئی مدد کے لیے تیار نہیں ہے۔”
انہوں نے وضاحت کی کہ ان کے شوہر نے 2015 میں کینسر کے خلاف جنگ ہار دی تھی، اور اس وقت شاہ رخ خان نے ایک وعدہ کیا تھا جو ابھی تک پورا نہیں ہوا۔ وِجیتا نے ذکر کیا کہ شاہ رخ اور آدیش کی دوستی بہت گہری تھی۔ آدیش کے انتقال سے ایک دن پہلے، شاہ رخ نے اسپتال میں ان سے ملاقات کی تھی۔ جب آدیش درد کی وجہ سے بات نہیں کر پا رہے تھے، شاہ رخ نے ان کے بیٹے کا خیال رکھنے کا وعدہ کیا تھا۔
وِجیتا نے مزید کہا کہ شاہ رخ نے اس وقت ان کو ایک فون نمبر دیا تھا، لیکن وہ ہمیشہ بند رہتا ہے۔ "میں نے کئی بار اس نمبر پر کال کرنے کی کوشش کی، لیکن وہ ہمیشہ آف ہوتا ہے۔”
انہوں نے اپنی مایوسی کا اظہار کرتے ہوئے کہا، "اب جب کہ میرا بیٹا اور میں واقعی شاہ رخ خان کی مدد کی ضرورت رکھتے ہیں، ہم ان سے رابطہ نہیں کر پا رہے۔ میں انہیں یاد دلانا چاہتی ہوں کہ وہ اپنے وعدے کو پورا کریں اور میرے بیٹے کی مدد کریں۔”
وِجیتا نے تجویز پیش کی کہ شاہ رخ خان اپنے بینر، ریڈ چِلِیز انٹرٹینمنٹ کے تحت ان کے بیٹے کے ساتھ ایک فلم پروڈیوس کریں، اور زور دیا کہ ان کا بیٹا ایک باصلاحیت اداکار ہے۔ "وہ ایک فلم ‘فرائیڈے’ پر کام کر رہا ہے جو ایک OTT پلیٹ فارم پر ریلیز ہوگی۔”